Universis presentes litteras inspecturis, Johannes, miseratione divina Matisconensis episcopus, salutem in Domino. Noverit universitas vestra quod Jocerandus de Buxeria, domicellus, in nostra presentia constitutus accepisse in feodum, homagium et casamentum, a venerabili et religioso viro Yvone, abbate Cluniacensi, et per ipsum a successoribus ejus imperpetuum, domum suam de Veteri Buxeria et motam, magnum nemus et garennam, molendinum et les bateors, broeillium et prata que homines tenent ab eo, villam del Cureis, montem de Monte Ravant usque ad magnam viam, et quicquid habet, tenet, pos[s]idet, vel quasi potest apud Veterem Buxeriam et a Malo Passu usque ad Sorberium de Contondre, in terris, pratis, vineis, nemoribus, pascuis, viis, semitis, aquis, aquarum decursibus, hominibus, serviciis, talliis, justiciis, proventibus, exitibus et aliis quibuscumque; et de hiis omnibus tenetur idem Jocerandus, et heredes sui de cetero facere homagium successoribus dicti abbatis qui pro tempore fuerint et fidelitatem servare. Juravit etiam dictus Jocerandus coram nobis quod antea non tenuerat nec tenebat ab aliquo in casamentum vel feodum, vel aliquo alio modo res superius nominatas; promittens sub prestito juramento dictum feodum et casamentum dicto abbati et ejus successoribus in perpetuum garantire, se et heredes suos et omnia bona sua mobilia et immobilia, ubicumque existentia, in manu dicti abbatis et ecclesie Cluniacensis, super hoc obligando pro predictis siquidem a dicto Jocerando in feodum acceptis. Confessus est coram nobis idem Jocerandus se habuisse et recepisse ab abbate predicto quinquaginta libras Viennensium in pecunia numerata, per sacramentum coram nobis corporaliter prestitum non numerate pecunie, doli et in factum exceptionibus specialiter renunciando. Reygnaude, siquidem dicti Jocerandi uxor, predictorum feodi, [h]omagii et casamenti acceptioni consensit, et per juramentum coram nobis de non veniendo contra corporaliter prestitum acceptavit. In cujus rei testimonium presentes litteras, ad petitionem dictorum Jocerandi et Reignaude, concessimus predicto abbati sigilli nostri munimine roboratas. Actum anno Domini M^o CC^o LX^o quarto, mense augusti.